દિલની વાત

દિલે કૈં વાત છુપેલી, સખી ! તુંથી કહેવી !હૃદય અર્પ્યું, જુદાઈ ત્યાં, સખી ! રાખે કેવી !

વ્યથા સ્હેતાં હજુ ખોયું નથી કૈં સ્નેહી તાન,છૂટે ના એ, પ્રિયે ! હૈયા તણી ખુશબો એવી !

જહીં ચૂસી જખમ ઉપભોગ લેતો મીઠો સ્નેહ,તહીં ખાવિન્દને સ્થાયી ઉરે ગાદી દેવી !

ભ્રમર ઉડી જતાં ભોગી નિરાશે ગાઈ ગાનઅરેરે ! પંકજે શાને પછી રજને લેવી !

કહું કાંઈ કટુ, મીઠું કહેવું કીધું પૂર્ણ;કહેવા દે મ્હને વાતો રહી જેવી તેવી !

નહીં તું કાન દે: રે ! રે ! થશે આ હૈયું ચૂર્ણ;બહેતર છે પછી મ્હારે જુદાઈ એ સ્હેવી !

દિલોની તો જહાં વાતો સદા માગી રહેનાર,ત્હને યાચતાં સુણવા જિગર મ્હારૂં, દેવી !

કહું જો અન્યને તો છે સુણી સુનારાં લાખ,મગર ત્હારા વિના જાણું ન દિલ બીજું સેવી !

દિલે છે વાત કૈં ધીખી રહેલી; ઠારું આવ,હૃદય અર્પું : જુદાઈ ત્યાં, સખી ! આવી કેવી !