Poem 14

Et nunc dilectum speculum, pro more retectum,Emicat in mensâ, quæ splendet pyxide densâ.Tum primum lymphâ se purgat Candida nympha;Jamque sine mendâ, cœlestis imago videnda,Nuda caput, bellos retinet, regit, implet, ocellos.Hâc stupet explorans, seu cultûs numen adorans.Inferior claram Pythonissa apparet ad aram,Fertque tibi cautè, dicatque superbia! lautè,

Dona venusta; oris, quæ cunctis, plena Iaboris,Excerpta explorat, dominamque deamque decorat.Pyxide devotâ, se pandit hic India tota,Et tota ex istâ transpirat Arabia cistâ.Testudo hic flectit, dum se mea Lesbia pectit;Atque elephas lentè te pectit, Lesbia, dente;Hunc maculis nôris, nivei jacet ille coloris.Hic jacet et mundè mundus muliebris abundè;Spinula resplendens æris longo ordine pendens,Pulvis suavis odore, et epistola suavis amore.Induit arma ergo Veneris pulcherrima virgo,Pulchrior in præsens tempus de tempore crescens;Jam reparat risus, jam surgit gratia visûs,Jam promit cultu miracula latentia vultu;

Pigmina jam miscet, quo plus sua purpura gliscet,Et geminans bellis splendet magè fulgor ocellis.Stant Lemures muti, nymphæ intentique saluti,Hic figit zonam, capiti locat ille coronam,Hæc manicis formam, plicis dat et altera normam;Et tibi vel Betty, tibi vel nitidissima Letty!Gloria factorum temerè conceditur horum.